د قرآن کریم اغېزه د عبدالقادر خټک پر شاعرۍ

خلاصه

عبدالقادر خټک د پښتو ژبې نومیالی او وتلی شاعر دی، او د پښتو ادب کره کتونکو نوموړی د تورې او قلم خاوند شاعر بللی اروا ښاد  خټک په هر ډګر کښې خپل اس ځغلولی او شاعري یې کړیده، نوموړي دا خبره په اثبات رسولې  چې هغه په هره موضوع کښې شعر ویلی شي. داسي موضوع اوعنوان به نه وي چې هغه پکې خپله طبع ازمایي نه وي کړې، هغه که اخلاقي شاعري ده او که تصوفی ده اویا هم ذاتی شاعری. دلته مونږ یوازې د خټک بابا  د شاعرۍ په یو اړخ باندې خبرې کوو او هغه له قرآن کریم څخه د بابا  اغیزمنتیا ده، په دې معنی چې شاعر پخپله شاعری کې د قرآن کریم څخه څومره اغېزمن برېښي؟ د نوموړی شاعر په فکر او شاعری باندې د قرآن کریم تآثیر او اغېزې په بيلا بیلو ډولونو څرګندیږي.